လူ့အခွင့်အရေး လူ့ဂုဏ်သိက္ခာ နိုင်ငံတကာတော် ရုပ်ရှင်ပွဲတော် ဇွန် ၁၅ တွင် စမည်

ဒါရိုက်တာ မင်းထင်ကိုကိုကြီး ဦးစီးသည့် လူ့အခွင့်အရေး လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော်ကို ဇွန်လ ၁၅ ရက်မှ ၁၉ ရက်နေ့အထိ ရန်ကုန်တိုင်းအတွင်း ကျင်းပမည်ဟု သိရသည်။ ဇွန် ၁၅ ညနေ ၆ နာရီတွင် ဖွင့်ပွဲအခမ်းအနားကို ရန်ကုန် နေပြည်တော် ရုပ်ရှင်ရုံ၌ ကျင်းပမည်ဖြစ်ပြီး ဇွန် ၁၆၊ ၁၇၊ ၁၈ တွင် ရန်ကုန် Junction Square ရှိ ရုပ်ရှင်ရုံ ၂ ရုံတွင် ဇာတ်ကားများ ပြသသွားမည် ဖြစ်ကြောင်း ဇွန်လ ၈ ရက်နေ့က ရန်ကုန် ၇ မိုင်ရှိ HRHDIFF ရုံးခန်းတွင် အဆိုပါ ရုပ်ရှင်ပွဲတော်နှင့် ပတ်သက်သည့် သတင်းစာရှင်းလင်းပွဲ ပြုလုပ်စဉ် ဒါရိုက်တာ မင်းထင်ကိုကိုကြီးက ပြောခဲ့သည်။

ရုပ်ရှင်ပွဲတော်တွင် ပြသရန် မြန်မာကား ၂၈ ကား၊ နိုင်ငံတကာ ဇာတ်ကား ၂၆ ကား၊ ကလေးငယ် များအတွက် ဇာတ်ကား ၁၁ ကား တို့ကို ဝင်ကြေးအခမဲ့ ပြသသွားမည်ဖြစ်ကြောင်း သိရသည်။

“ဖွင့်ပွဲမှာ ရုပ်ရှင်ကား တကား ရွေးထားတယ်။ အဲဒါကတော့ မြန်မာနိုင်ငံက ကားပါ။ ဒါရိုက်တာ ယဉ်နန်းသိုက် ရိုက်တဲ့ အကျဉ်းစံဘ၀ဆိုတဲ့ Documentary မှတ်တမ်း ရုပ်ရှင်ပြမယ်။ အဲဒါက မိနစ် ၅၀ စာ ရှိပါတယ်။ Opening Film အဖြစ် ရွေးထားပါတယ်။ ကျန်တဲ့ ဇာတ်ကားတွေကတော့ Junction Square မှာ ပုံမှန် ရုပ်ရှင်ပြတဲ့ အချိန်တွေအတိုင်း အခမဲ့ လာရောက် ကြည့်ရှုနိုင်ပါတယ်” ဟု ဒါရိုက်တာ မင်းထင်ကိုကိုကြီးက ဆိုသည်။

ရုပ်ရှင်ပွဲတော်အတွက် နိုင်ငံတကာမှ ဇာတ်ကားများကို ၂၀၁၃ ဇန်နဝါရီတွင် စတင် ဖိတ်ခေါ်ခဲ့ကြောင်း နိုင်ငံတကာ ဇာတ်ကား ၅၀၊ မြန်မာဇာတ်ကား ၃၇ ကား စုစုပေါင်း ၈၇ ကား လက်ခံရရှိခဲ့ကြောင်း၊ ပြပွဲတွင်ပြသရန် မြန်မာဇာတ်ကား ၂၈ ကား၊ နိုင်ငံတကာ ဇာတ်ကား ၂၆ ကားကို ပြန်လည်ရွေးချယ် ပြသခြင်း ဖြစ်ကြောင်း သိရသည်။

ပေးပို့သော ဇာတ်ကားများထဲမှ ပြိုင်ပွဲအတွက် ဇာတ်ကားများကိုလည်း ရွေးချယ်ထားရာ နိုင်ငံတကာ ဇာတ်ကား ၁၁ ကား၊ မြန်မာဇာတ်ကား ၁၅ ကား၊ ကလေးများ အတွက် ဇာတ်ကား ၅ ကားတို့ ပြိုင်ပွဲဝင်ခွင့် ရမည်ဖြစ်သည်။

ချီးမြှင့်မည့် ဆုများနှင့် ပတ်သက်ပြီး ဒါရိုက်တာ မင်းထင်ကိုကိုကြီးက “ဆုတွေကတော့ ၃ ဆုပေးမှာပေါ့။ အောင်ဆန်းစုကြည် ဆု၊ ကိုမင်းကိုနိုင်ဆုနဲ့ မြန်မာနိုင်ငံ လူ့အခွင့်အရေးနေ့ မတ် ၁၃ ဆု အပြင် ထပ်တိုးတာကတော့ နော်ဝေနိုင်ငံက ကမ်းလှမ်းလို့ NBC ( Norway – Burma Committee) ဆုပေးမယ်၊ မြန်မာကားတွေကို ရွေးပေးပါမယ်။ နောက် ချက် သမ္မတ နိုင်ငံက ဆုပေးဖို့ ကမ်းလှမ်းတာရှိပါတယ်။ Title ကတော့ အခုထိ မရွေးရသေးပါဘူး။ ဆုကတော့ သေချာပါတယ်။ မြန်မာက ၁၅ ကားတွက် ဆုက ၅ ခု၊ အင်တာနေရှင်နယ် ၁၁ ကားထဲကတော့ ၁ ဆုတည်း ပေးမှာပါ။ ဒေါ်အောင်ဆန်းဆုကြည် ဆုပါ” ဟု ပြောသည်။

ပြိုင်ပွဲဝင်များအတွက် ပေးအပ်မည့် ဆုကြေးများကိုမူ ဆုံးဖြတ် ရွေးချယ်နေဆဲ ဖြစ်ကြောင်း ၎င်းက ဆိုသည်။

အဆိုပါ ရုပ်ရှင်ပွဲတော်တွင် ဆုများကို ရွေးချယ်ပေးမည့် Jury အဖွဲ့ဝင်များမှာ နိုင်ငံတကာမှ ၄ ဦး၊ ပြည်တွင်းမှ ၃ ဦး ပါဝင်မည်ဖြစ်ကြောင်း သိရသည်။

International Documentary Film Festival Amsterdam (IDFA & IDFA Bertha Fund) မှ ဒါရိုက်တာ Ally Derks၊ အကယ်ဒမီ ဆွေဇင်ထိုက်၊ Human Rights Film Network ၏ ဒါရိုက်တာ Igor Blazebic၊ ကနေဒါနိုင်ငံ၏ နာမည်ကျော် ဒါရိုက်တာ Peter Wintonick၊ တောင်အာဖရိက ဒါရိုက်တာ ထုတ်လုပ်သူ Don Edkins တို့က နိုင်ငံတကာ ရွေးချယ်ရေးအဖွဲ့ အဖြစ် လည်းကောင်း၊ ကိုမင်းကိုနိုင်၊ ဒါရိုက်တာ မင်းထင်ကိုကိုကြီး၊ ဒေါ်ဆွေဇင်ထိုက်တို့က ပြည်တွင်း ရွေးချယ်ရေး အဖွဲ့ အဖြစ် လည်းကောင်း၊ NBC ဆုအတွက် Equality Myanmar အဖွဲ့မှ ကိုအောင်မျိုးမင်း၊ ဝဿန် ရုပ်ရှင်ပွဲတော်မှ မသူသူရှိန်၊ ကဗျာဆရာ သစ္စာနီ တို့က လည်းကောင်း၊ ချက် သမ္မတနိုင်ငံမှ ပေးမည့် ဆုအတွက် ဘလော့ဂါ နေဘုန်းလတ်၊ ဖြိုးဖြိုးအောင် (ဗကသ)၊ သိဒ္ဓိ တို့ကလည်းကောင်း အကဲဖြတ် အဖြစ် ပါဝင်ရွေးချယ် ဆုံးဖြတ်ပေးကြမည် ဖြစ်ကြောင်း ဒါရိုက်တာ မင်းထင်ကိုကိုကြီးက ပြောသည်။

အကဲဖြတ်ဒိုင်အဖြစ် ပါဝင်မည့် အကယ်ဒမီ ဆွေဇင်ထိုက်က “အဲဒီပွဲအတွက် အကဲဖြတ်ဖို့ ၃ ခု ပေးထားတာ ရှိပါတယ်။ Themeရယ် Technique ရယ် Category ရယ်၊ အဲဒီ ၃ ခုအပေါ်မှာ ကြည့်ပြီး ကျမတော့ ပေးတောင်ပေးထားပြီး သွားပါပြီ။ ကျမ ကတော့ ကိုယ့်နယ်ပယ် ဖြစ်တဲ့ ရုပ်ရှင်ထဲကနေ ခုန်ဆင်းခဲ့တာ လွန်ခဲ့တဲ့ အနှစ်လေးဆယ် လောက်ကတည်းကပေါ့။ ဒါကြောင့် ကိုယ်လည်း တတ်နိုင်တဲ့ ဘက်ကနေ ခုန်တက်လို့ ရအောင် လိုက်လုပ်ပေးနေတဲ့ သဘောပါပဲ။ လူ့အခွင့်အရေး ရုပ်ရှင်ပွဲတော် ဆိုတော့ လူ့အခွင့်အရေးနဲ့ ပတ်သက်လို့ ပြောရရင် ဒီမှာရှိနေတဲ့ လူတွေကလေ Human Rights ရဲ့ အဓိပ္ပာယ် ဖွင့်ဆိုချက်ကို သေချာ မသိကြဘူး။ ကိုယ့် Rights ကို ကိုယ်သိပြီးတော့ ကိုယ့်တာဝန်ကို ကိုယ်ယူနိုင်ကြမယ် ဆိုရင် လောကကြီး ဟာလည်း သာယာသွားမှာပဲ။ အခုအချိန်မှာ ကိုယ့်တာဝန်လည်း ကိုယ် သိပ်မသိဘူး၊ ကိုယ့် အခွင့်အရေးကိုလည်း ကိုယ်သိပ်မသိဘူး ဆိုတော့ ဒီလိုပဲ ဖြည်းဖြည်းချင်း ပြောယူရမှာပေ့ါ” ဟု ရှင်းပြသည်။

လူ့အခွင့်အရေး လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော်ကို ရန်ကုန်တိုင်းတွင် ကျင်းပပြီး ကျန် တိုင်းနှင့်ပြည်နယ် ၁၃ ခုတွင်လည်း နယ်လှည့် ရုပ်ရှင်ပွဲတော်အဖြစ် ကျင်းပမည်ဟု ဦးမင်းထင်ကိုကိုကြီးက ဧရာဝတီသို့ ပြောသည်။

“ရုပ်ရှင်ပွဲတော်က ရန်ကုန်မှာ ဇွန်လပြီးရင် ခရီးသွားရုပ်ရှင်ပွဲတော်၊ ရွေ့လျား ရုပ်ရှင်ပွဲတော်လို့လည်း သုံးလို့ရတယ်။ဇူလိုင် ကနေ ဒီဇင်ဘာအထိ တိုင်းနဲ့ပြည်နယ် ၁၃ ခုက မြို့ကြီး ၁၃ ခုမှာ တရက် လည်ပြဖို့ ရှိပါတယ်။ ဆုရတဲ့ ကားတွေပြမယ်။ နောက် ဆုရတဲ့ကားအပြင် တခြား သင့်လျော်တဲ့ကားတွေပါ ပြမယ်။ နယ်တွေမှာ၊ ရုပ်ရှင်ရုံတွေမှာ ပြဖို့ခက်မယ် ထင်ပါတယ်။ ရန်ကုန်မှာတောင် ပြဖို့ တော်တော်လုပ်ရပါတယ်။ နယ်မှာကိုတော့ ရုပ်ရှင်ရုံတွေမှာ စကြိုးစားပါမယ်။ မရရင်လည်း ဟောလ်တွေမှာ ပြပါမယ်” ဟု ဆိုသည်။

ဧရာဝတီ
လူ့အခွင့်အရေး လူ့ဂုဏ်သိက္ခာ နိုင်ငံတကာရုပ်ရှင်ပွဲတော်နှင့် ပတ်သက်သည့် သတင်းစာရှင်းလင်းပွဲ ကျင်းပစဉ် (ဓာတ်ပုံ – နဒီထိုက် / ဧရာဝတီ)