အာဆက်ဒ်က လက်ရှိတွင် နှစ်ရှည်လများ ကြာမြင့်နေသော ပြည်တွင်း ပုန်ကန်မှုများကို မိမိတို့က အသာစီးဖြင့် ထိန်းချုပ်နိုင်ပြီ ဖြစ်ကြောင်းနှင့် ရုရှားထံမှ S-300 ဒုံးကျည်များကိုလည်း ဝယ်ယူရန် သဘောတူညီထားကြောင်း စသည်တို့ကိုပါ ကြေညာသွားသည်။ "S-300 လေယာဉ်ပစ် ဒုံးကျည်တွေ ဝယ်ယူတဲ့ထဲက ပထမတစ်သုတ်ကို လက်ခံ ရရှိပြီးပါပြီ"ဟု အာဆက်ဒ်က ဆိုသည်။ "ရုရှားနဲ့ ချုပ်ဆိုထားတဲ့ စာချုပ်ဟာ လက်ရှိ ပြည်တွင်းရေး အခြေအနေတွေနဲ့ ဘာမှ မဆိုင်ပါဘူး။ ရုရှားကလည်း ဒီစာချုပ်ကို ပြီးစီးအောင် အကောင်အထည် ဖော်ဖို့ စိတ်ဝင်စားတယ်လေ"ဟု အာဆက်ဒ်က ရှင်းပြခဲ့သည်။ S-300များသည် ကီလိုမီတာ (၂၀၀) အကွာအဝေးထိ ရှိနေသော ပစ်မှတ်များကို ချေမှုန်းနိုင်ရာ အစ္စရေး မြောက်ပိုင်းတွင် ပျံသန်းနေသည့် တိုက်လေယာဉ်များကိုပါ ခြိမ်းခြောက်နိုင်ခြေ ရှိနေသည်။
အာဆက်ဒ်က ပုန်ကန်မှုများနှင့် ပတ်သက်ပြီး "အကြမ်းဖက်သမားတွေဘက်က ထင်ထားတာထက် အားကောင်းကောင်း ခြေလှမ်းတွေ ရှိခဲ့တယ် ဆိုရင်တောင် ခုချိန်မှာတော့ ကျွန်တော်တို့ရဲ့ တပ်ဖွဲ့တွေက အသာစီး အခြေအနေကို ရောက်နေပါပြီ"ဟု ဆိုသည်။ အာဆက်ဒ်သည် သတင်းမီဒီယာများနှင့် တွေ့ဆုံရာတွင် တော်လှန်ရေးသမားများကို အကြမ်းဖက်သမားဟုသာ အစဉ်တစိုက် သုံးနှုန်းလေ့ ရှိသည်။ လတ်တလောတွင်မူ အာဆက်ဒ်၏ အင်တာဗျူး အပြီးနောက် အစ္စရေးသည် ရုရှားနှင့် ဆီးရီးယားကြား လက်နက်တင်ပို့မှု အခြေအနေနှင့် ပတ်သက်၍ ပိုမို ခိုင်မာသော သတင်းအချက်အလက်များ စုဆောင်းနေကြောင်းလည်း သတင်းများ ထွက်ပေါ်လာခဲ့သည်။
Planet.com.mm
